سوسن وعبدو

بونسوار عليكو

أمبارح خير اللهم اجعله خير كان تاريخ  

2-3-2013 

والتاريخ الواضح بالاعلي ده يوم من الايام التي لا ولن تتنسي من ذكرتي .. قولولي ليه هاجولكم ليه

امبارح بقي ولا اول مره ف تاريخي الجماوي اروح بدري

 ونازله قبل معادي بساعه ونص ومبسسسسسسسسسسوطه 

والدنيا ربيع والجو بدييييييييع

 وماشيه براحتي علي سرعه 40 والناس اللي ورايا شاغلين سب وقلت ادب وانا عامله من بنها

الموهم قبل ما اوصل للجيم بدات احس باصوات غريبه بقيت اعلي من صوت حبيبي عمرودياب وهوا بيغني ف الكاسيت

وفجاه لقيت سوسن (العربيه ) بقيت قاعده تصوت وصوتها قاعد يعلي 

قلت ياواد طنش خالص يمكن من السيارات الموجوره

وبعدين لما لقيت الناس اللي جنبي قاعدين يبصو علي سوسن اتاكدت ان الصوت من عندي !!!!!!!!!!!

المهم ببص علي الموشر بتاع الحراره لقيته علي الاخر ياخبرررررررررر

المهم بطلت العربيه وقلت انزل احط مايه

والا فجاه ابص القي الخرطوم بتاع الراديتر مقطوع

الكلام ده كان الساعه 2:30 

المهم اتصلت بابن خالتي العزيز وجالي متاخر نص ساعه 

المهم الجو حررررررررر وانا لابسه تقيل ومش عارفه 

اشغل التكييف وحاجه مدهشه الحقيقه

بعدين قلنا نروح نشتري قطع الغيار ونجيب حد يركبها عشان نحرك المرحومه زوزن 

ركبنا تاكسي صاحبه راجل بركه كده شبه عم ابدوو بتاع الافلام الابيض و اسود اللي كان دايما يطلع ف كل الافلام بنفس الاسم (ابدو ياستو هانم ) المهم

سالته عن الموضوع بتاع الخرطوم وكده وعرض المساعده وفكرت وقلت ماشي تعالي اعمله انت وياريتني ماسمعتني  ياااااااااااااريت

فضلنا ساعتييييييييييييييييين نفك في مسمارين وساعه تانيه بنحاول ندخل خرطوم جوا اسوره من الحديد ااااااااااااااااااااااع

وعم عبده مصمم راسه والف جذمه (مقاس ) 47 انه يفك الاسوره الحديد دي بسنانه 

نقوله ياعم جامده وده ابدااااااااااا

عاملي فيها عنتر جبنه وهوا لو حواجبه اتنعكشت من مكانها اتزان جسمه 

هايتاثر

انت ياعم طب نعملها موقت لحد مانمشي لمكان يركبها  ابتاااااااااااا

ياعم يايهديك يرضيك ابتااااااااااا

المهم ربنا بعتلي نجدااااااا من السما واحد سواق تاكسي وعرض علينا المساعده وسبحان الله ركب الخرطوم ف البتاعه الحديد دي في اقل من دقيقه

لما انا شفت كده بقيت عايزه اعمل زي فيلم صراع الافيال وانقض علي عم عبدو اطلع الجلد ف ناحيه والعضم في ناحيه 

بس قلت حرااام اهو كان قاصده يساعد 

المهم خلصنا علي الساعه 6 وتم بحمد الله

جالي هاتف من بعييييييييييييييد قالي يابنت يانينو يامنم نما انتي روحي شيكي علي المايه والراديتر ف البنزينه 

المهم رحنا وبعد كل العناااااااااااااااااء ده طلع بردو الخرطوم مش متركب صح ااااااااااااااااااااااااااع هاتولي المطافيييييييييييييييي

المهم حمدت ربنا والراجل بتاع البنزينه ركبها بعد ما استغرب طبعا ازاي تطلع بالسهوله دي ونضفت الراديتر وسوسن بعد مابقت بتعيط وعامله زي اللي طالعه من فيلم البؤساء بعد النضافه دي بقيت بتزغرط وعامله داوشه 

واتعلمت من الدرس القاسي ده ان كل يوم هاشيك علي المايه 

3 مرات ف اليوم

مره بعد كل واجبه

لان انا بعد اليوم ده لازم افكر ااااااااااالف مره

 قبل ما انسي مايه سوسنتي حبيبتي

اااااااااااااااااه منك لله يامرسي اشوف فيك يوم 

حد هايقولي وايه دخل مورزي ف الموضوع هاقوله خلييييييييك في حالك لو سمحت كفايه اللي انا فيه

يلا اقعدو بالعافيه